چیلله‌خانا آلتی شهرده
سئویشیب ساواشان،
سوسادیغیم سعید متین‌پورا
اوچ بویوت‌لو تصویرلر، قیرخ آنلاملی سؤزجوک‌لره گیزلندی
سنی سئودی‌ییم گؤوهر
و سحر نامازلاری
ثاواب یازان ملک‌لر بیله
سنی آغلادیلار
سجاده‌م اوستونه.
تارلا تارلا سوسدوم سنی
قویو قویو سؤیله‌دیم.
سوکوتوم باغیردی سنی
گلن نسیل‌لره.
بلوق بلوق کامئنت گزدی آدین
قزئته‌لر
ان بؤيوك تيترده‌ن بویون قاچیراندا.
تارلا تارلا سوسدوم سنی
قویو قویو سؤیله‌دیم.
سوکوتوم باغیردی سنی
گلن نسیل‌لره
سوساديم سنه
طوفان اسدی شعریمین قافیه‌لرینه
تاققا تاخ، تاخ‌تاخ
قاپیلار چیرپیندی یئددی شهرده
آبدال‌لار یول ایتیردیلر
و خوجا احمد یسوی
ریاضت مزاریندان
آیاغا قالخمادی
قوم – شهریور ۱۳۸۸
سید حیدر بیات
