بیر داها یاللی سیرانیزدا اونو گؤرمه‌یه‌جکسیز!
Wed 28 09 2011
سید حیدر بیات
حالیم هئچ ده خوش دئییل. و ایندی حالی خوش اولمایان یالنیز من دئییلم. تانری عدالتله پایلاییب بو اؤفکه قاریشیق حوزونو ایچیمیزده بو گون.
ایبراهیم جعفرزاده‌نی یئددی ائپیزوددا یازیرام:
1
اونو تانیماییردیم. توی خبرینی ائشیتدیم و سونرا تویدان بیر آز سونرا دوستاغا گئتدی. علیرضا قولونجو بیله‌سینده آز گؤرونن بیر دویغوساللیقلا، مسینجیرده یازدی: به‌ی! آدامین آغلاماغی گلیر، حنظله یادیما دوشدو.
اسلام پیغمبری‌نین صحابه‌لریندن ساییلان حنظله، پیغمبری ساواشدا تک قویماسین دئیه گردک (زفاف) گئجه‌سی‌نین یارینی ساواشا گئتدی و شهید اولدو.
2
زنگاندا رضا عباسی‌نین تویودور. بیرینجی دؤنه اولاراق ابراهیم جعفرزاده و خانیمی مینا کهربانی ایله گؤروشوروک. گئجه‌نی صبحه کیمی ده سعید متین‌پورا قوناغیق. سعیدین آسیلی گؤنلریدیر. دوستاق حؤکمو وئریلیب اما هله اجراء اولونماییب. صؤبحه کیمی شعر اوخویوروق. ایبراهیم اما سوسقوندور مینا ایله بیرگه اوتوروب دینله‌ییرلر یالنیز. و من اونون سوسقونلوغونا دؤزه بیلمه‌ییب بیر متلک ده آتیرام.
سونرالار عباس نعیمی دئییر: ابراهیم شعر مجلیسلرینده چوخ دانیشماز اونون ساحه‌سی تئوریک ساحه‌لر.
3
مهدی قره‌داغی ایله مریم جباری‌نین تویودور. تهراندا ع.نعیمی‌نین ائوینده ییغیشمیشیق بیرگه تویا گئدک. ابراهیم دا مینا خانیملا گلیر. آنجاق بیر ده‌ییشیک‌لیک اولوب حیاتلاریندا، قوجاقلاریندا بیر بالاجا گؤزل قیز وار. ایبراهیم عائیله‌دن اوزاق یاشاییب معیشت آردینجا اولدوغونا گؤره قیزینا تامارزی‌دیر، نئچه گوندور قیزینی گؤرمه‌ییب. قیزی قویورلار اوتاغین او باشینا گؤره‌لر آتاسی‌نین قوجاغینا گلیر یا یوخ؟ بیزیم ارسلان قاچیب بالاجا قیزین قاباغینی کسیر. ایبراهیم ارسلانا یالواریر: سن آللاه چکیل اویانا گلسین قوجاغیما!
دوغروسو ایبراهیمین عائیله‌سی بو نئچه ایلده بیر بیریندن دویمادیلار.
4
توی باغدادیر. ابراهیم گیلین ماساسی بیزیم ماسانین یانیندادیر. بیزیم خانیم ایله مینا خانیمین اخلاقلاری بیربیرینه اویور دئمک. آستادان دانیشیب پیچیلداشیرلار. سونرا اوشاقلارین یوخولاری گلیر. آیلار، سینا و ارسلانی آپاریریق باغین اوتاغینا. آرادا فورصت اولور بیر ِآز تویون سس سلمیندن اوزاقدا دانیشاق. بیلیرم مینا ایله عطیه‌نین آراسی سازدیر. سوروشورام: عطیه ایله دانیشا بیلیرسیز هئچ؟ روحیه‌سی نئجه‌دیر؟ مینا خانیم عطیه‌نین روحیه‌سیندن راضی‌دیر.
بو آرادا تویدا اولان خوی اوشاقلاری یاللی گئده‌جک‌لر. ابراهیمی یاللی گئتمه‌یه چاغیریرلار. ابراهیم یورغوندور بیر آز، دال چاتیر. مینا ابراهیما باخیر گئت! دئییر و بیر قادین ارینی ساواشا گؤندرن کیمی ابراهیمی یاللی گئتمه‌یه گؤنده‌ریر. ابراهیم گئدیر بیزیم ده سؤزوموز قورتاریب، اما مینا خانیم سایقیلی داورانماق اوچون نئچه دقیقه اه‌یله‌شیب و سونرا اجازه ایسته‌ییر.
5
سئن اوزه‌رینده خوی اوشاقلاری یاللی گئدیرلر. نوید موثمرین سولدوزدان اوخودوغو لیریک - ساواش هاوالارینی آنیمساییرام. گئرچکدن میللی وارلیقلاریمیزا، اویونلاریمیزا، موسیقی‌میزه گووه‌نیرم. اما ایندی اوندان اؤنملی اولان، بو زنگین ده‌یرلرین قدرینی بیلن اینسانلاردیر سئن اوزه‌رینده یاللی گئده‌نلر. چوخو دوستاغی تجروبه ائدیب دئمک. بونلارین یاللی گئتمه‌سینده باشقا باشقا آنلاملار واردیر و مینا ابراهیمین چیینینه ال قویوب یاللی گئتمه‌یه گؤندرنده، نه ایسته‌دی‌یینی چوخ یاخشی بیلیردی. بونلار بو ده‌یرلری ساوونماق اوچون چوخلو هزینه‌لر وئریب‌لر و آذربایجان مودئرن کیملی‌یی، ائله بورادا اؤز آنلامینی اولوشدورا بیلییب‌دیر.
یاللی تویا باشقا بیر هیجان وئریر. بیزیم خانیم دئییر: من آند ایچمیشم میللتچی اولمایام آنجاق آند ایچمه‌سئیدیم ایندی بو فضادا میللتچی اولموشدوم حتمن.
یاللی قورتاریر، خویون باشقا بیر اویونونو اویناییر اوشاقلار. عباس نعیمی‌نین «اوزون دره» اویونونو اجرا ائتمه‌سینی هئچ اونوتمارام.
توی قورتاریر. تویلاردا گؤروشمه‌یی آرزیلاییریق بیر بیرییمیزه. بیز قوما دؤنمه‌لی‌ییک، ابراهیم و باشقا دوستلارلا ساغ اوللاشیریق. مینا بیزه سؤز وئریر حتمن قوما قوناق گلسین‌لر.
6
سحر تئزدن خبری اینترنیتده یازیر اوشاقلارین بیریسی. تئز قاچیب زنگ آچیرام عباس نعیمی‌یه. عباسین آغلادیغی سسیندن بللی‌دیر. اوچاقدادیر، اؤزونو تئز خویا یئتیرمک ایسته‌ییر. خویون ان پارلاق، ان فرقلی میللتچی‌سی آرامیزدان گئدیبدیر. خبر بوغونتو کیمی هئی درینلره دالدیریر بیله‌می. هامی اؤفکه ایله حوزون یاشاییر، آنجاق خوی اوشاقلاری باشقا بیر حالدا اولمالیدیرلار، اونلارا فیکیرلشیرم و سعید ایله عطیه‌یه. سعیدین اسمز سسینین اسدی‌یینی امانی‌نین اؤلومونده دئنه‌میشدیم، تئلفون آرخاسیندا. ایندی بیر داها دا ائوین دوستاغیندا او سسی دینله‌ینلر اولاجاق.
او سسین تصوورو بیله بوتون انرژیلریمی آلیر.
7
و سن دوستوم عباس به‌ی نعیمی! و بوتون خویلو دوستلاریم! محمد به‌ی عباس‌پور! شیرزاد! عطا! بیر داها یاللی سیرانیزدا ابراهیمی گؤرمه‌یه‌جکسیز!
و سن دوستوم رامین جبارلی! و باشقا غوربت ده یاشایان دوستلاریم! غوربت‌ده آغلایان گؤزلرینیزی بورادان اؤپورم.
و سن بؤیوک قارداشیمیز عباس به‌ی لسانی! بیلمیرم خبری هاچان بیله‌جک‌سن، اما رجا ائدیرم آجیلاریمیزا داها زهر قاتما! آکسییانی سیندیر! بو خبرله آکسییا نئچه قات دؤزولمز اولار! سنین سئچیمین هر نه اولسا آنجاق بیز ده باشقا بیر آجی‌یا دؤزوم قالماییب.
باخ سعیدین سنه یازیب اوشاقلارا قول چکدیردی‌یی مکتوبو خاطیرلاییرمیسان؟ مکتوبون باشلیغی بو ایدی:
اوروجونو سیندیر قارداش!
و او مکتوبا
ابراهیم جعفرزاده ده
مینا کهربائی دا
قول چکمیشدیلر.
قوم – سید حیدر بیات